五大創業失敗的原因

更新日期:6月 19


眼見身邊好多朋友個個都開公司,有人開餐廳,有人做網店,有人開補習社,有人開會計師樓,有人做樓宇買賣,有人開外籍雇傭公司,見到個個都成功,自己都唔想執輸,膽粗粗辭咗份工,攞住一筆唔係好多嘅積蓄,貿貿然走去創業,你覺得你會成功咩?


第一 盲目崇尚成功

每日睇好多成功語錄,名人故事,熟讀佢哋所有嘅生平,事蹟,經驗,然後照板煮碗將所有他們的故事完全套用在你的創業旅程上,以為只要走過他們行過的路,你就能夠和他們一樣變得成功,請問你醒未啊? 點解所有語錄都係成功人士所講? 點解所有故事都係記錄名人的事蹟? 點解成功人士嘅生平,事蹟,經驗四周圍都見到? 因為根本冇人有興趣去為失敗嘅人敘述佢哋嘅經歷,一個人成功,背後可能有一百萬人失敗,而你每一日就係睇住成功嘅一個人,而完全忘記咗個一百萬人失敗嘅原因,其實我哋要睇嘅,要明白嘅,並唔係點樣成功,而係點樣避免失敗,成功嘅人永遠同你分享嘅都係成功嘅經驗,但佢哋有冇講過俾你聽佢失敗過幾多次?佢有冇話過俾你聽佢潦倒嘅時候嘅生活係點樣過呢?


第二 完美主義

好多人失敗嘅原因就係因為佢覺得而家唔係開始嘅時候,因為佢嘅諗法,佢嘅產品並未完善,到有一日完成嘅時候,就係創業嘅好時機,我只係想問一句,你憑咩咁肯定你嘅諗法同產品一定會令你成功呢? 每一個成功創業嘅人士佢哋都會有一個理念,不斷求變,不斷創新,哪怕今日的我推翻昨日的我,因為成功係要經過無數次的失敗,我記得有一個朋友曾經同我分享,佢話佢一開始嘅時候佢想做 E Card,佢希望佢公司可以做到最靚嘅 E Card,但經過一段時間佢發覺呢個方法,呢個方向唔可行,佢就開始轉型,做網上嘅小遊戲,慢慢就開始發展到手機遊戲,最後佢成功了,如果每一樣野都要等到完成,完美,先去開始嘅話,其實根本可能一開始你已經係失敗,點解要花咁多嘅時間係一個本身已經失敗嘅產品或者理念上面?點解唔即刻開始,令到個市場去明白你嘅理念或者產品,收集用戶嘅數據同埋意見,去優化你嘅產品或者理念,不斷改進,咁樣唔係更容易令你成功咩? UGC - User Generated Content 往往令你更易踏上成功之路。


第三 懶

一開始創業嘅時候通常都會滿腔熱誠,每一日派到個時間表密密麻麻,希望能夠一日用晒二十四小時,慢慢時間過去,發覺距離成功嘅路仲有好遠,慢慢就開始散漫,以前 9 點起身,慢慢變成 11 點,下變成下午 1 點,自律非常重要,因為你創業嘅時候,冇任何一個人會係你身邊督促你,更加冇任何一個人會係你身邊陪伴你,鼓勵你,創業嘅路永遠都係孤單! 任何時候,懶,都會害你一世!


第四 冇休息時間

懶冇錯係會令到你失敗,但係過分勤力同樣都會令你失敗,休息是為了走更遠的路,呢句說話從來都非常正確,如果你沒有一個健康嘅身體,沒有充足嘅睡眠,定時飲食,即是今日你成功啦,你根本都無福消受,休息能夠令到你有更創新嘅理念,休息能夠令到你放鬆身體,休息從來不是奢侈品,而是必需品!


第五 太容易放棄

堅持永遠是成功之道,創業嘅路上好多人會否定你,好多人會取笑你,好多人會叫你放棄,好多人會話你唔好發夢啦,呢啲說話我聽過無數咁多次,你嘅人生應該由你去決定,哪怕 50歲,60歲,70歲你先創業成功,你行過嘅路一定有好多值得你回味嘅地方,因為你曾經為你自己選擇了一條無悔嘅路。


講完呢五樣嘢,你可能會話,你又喺度吹水,有冇啲實際啲嘅嘢呀?鬼唔知阿媽係女人!實際嘅嘢可以有好多,但從來冇任何實際嘅嘢可以令到你成功,從來冇一條公式係等於成功,好多人話心理會影響生理,心態無言係成功路上好重要嘅一環,知識你可以從書本上面獲得,技能同經驗你可以從生活上面攞到,但係心態就只有你自己幫到自己,創業嘅人,有一個好大嘅心,可以容納無數次嘅失敗,無數人嘅批評,無盡嘅孤單,失望,徬徨,但係只有一小撮創業嘅人,擁有一顆堅持的心,而往往一直堅持的人,才是到最後踏上成功之路的人。唔好見到人哋創業,你就走去創業,問吓你自己,你係咪真係做得到,唔係嘅話,就唔好浪費時間。

“The one who succeeds is the dreamer who never gives up.”

立即登記

0 次瀏覽

© 2020 by samsonlomarketing.com