落廣告無用,五大主要死因



喺香港越來越多人選擇網上落廣告,而家好多人都會選擇用 Facebook,當大部份人都用緊同一個平台嘅時候,就會產生非常之高嘅競爭程度,加上 Facebook 演算法不停嘅改變,相比起以前,Facebook 廣告難做左好多,如果你想喺 Facebook 上面仍然靠 Organic Reach 去接觸新嘅客人,好大理由相信已經冇呢支歌仔唱,當然 Facebook 廣告絕對係一個宣傳產品或者品牌非常之好嘅方法,如果想 Facebook 廣告做得好,投放金錢係一個唔錯嘅方法。


但你又要諗,你俾錢賣廣告,人哋又俾錢賣廣告,點解人哋會賣得好過你呢?點解你落嘅廣告冇效果呢?通常都係因為呢五個死因。


第一 投放廣告時間唔夠

好多人落廣告,每日就走去改下預算,落咗一日都唔夠就定斷個廣告做得差,做兩日唔夠就停咗佢, Facebook 廣告有好多唔同嘅功能同規則,雖然唔係話非常困難複雜,但都需要有一定嘅知識去運用同埋操作,投放廣告嘅時間最好唔好少於 72 小時,因為廣告需要學習,透過學習階段 Facebook 會幫你分析及尋找最佳嘅成效,如果經常性改變 Facebook 預算,設計或時間,會大大影響 Facebook 廣告嘅效果,導致你嘅廣告沒有成效。


第二 忽略廣告內容嘅重要性

好多人以為識得落Facebook廣告,識得設定目標用戶,客人就會自己走入嚟,但係廣告嘅重心永遠在於內容營銷,好嘅文案設計,加上關鍵字同廣告設計嘅配合,再加上廣告內容本身嘅吸引性,就能大大減低 Facebook 廣告嘅成本,用最低嘅價錢吸引更多嘅客戶,用心去設計廣告內容,對於Facebook廣告,或任何平台嘅廣告,都非常重要。


第三 完全冇策略 冇任何Re-Targeting

Facebook 廣告可以因應唔同嘅目標去做廣告宣傳,同時亦可以因應不同嘅目標,而去追蹤對你品牌有興趣嘅用戶,對佢哋進行 Re-Targeting,千祈唔好睇小策略嘅重要,大部份人都唔會因為睇咗一次廣告,就會購買,通常都係因為見過幾次,對你嘅產品了解更多,購買意欲先會提升,所以做唔同類型嘅廣告去累積客戶嘅信任度,增加佢哋嘅購買意欲,令佢哋成為你嘅客戶,並且一直追蹤,知道佢哋嘅購物模式同消費模式,對你往後嘅營銷策略和預算有非常大嘅幫助。


第四 預算唔合理

一日落廣告$10,$10好難反映可以得到啲乜嘢,通常好多人都會每日落$100廣告,但好多人往往都忽略左唔同嘅廣告目標應該要有唔同嘅預算,例如你想落廣告用作網頁流量,Landing Page View 同 Click 嘅預算就會大大不同,有可能會有10倍嘅分別,舉另一個例子,想落廣告作訊息數量,好多時候落$100,$200,$500 Per Day,都未必會得到一個訊息,因為Facebook 會因應不同嘅例子同數據分析,作出適當嘅預算測試,所以一定要好好記住,唔同嘅廣告目標係需要有唔同嘅廣告預算。


第五 太易放棄

好多人落 Facebook 廣告落咗一個禮拜就放棄,用咗一兩千蚊就放棄,就話 Facebook 廣告唔得,其實好多嘢都要因應唔同嘅測試,改良,累積,而最終先得到成果,千祈唔好半途而廢,唔好因為短時間嘅失敗,而放棄一個非常好嘅宣傳渠道,如果冇足夠嘅知識及技術去掌握Facebook 廣告,可以去上唔同嘅課程學習一下,增加自己嘅能力同技巧,咁樣先至會真正幫到你嘅品牌。


如果想唔使花一分一毫就可以得到回報,我諗所有嘅廣告平台都唔係好啱你,冇一樣野係唔需要付出就可以得到成果,Facebook 廣告幫左好多唔同嘅品牌,幫左好多唔同嘅人,只要落得Facebook 廣告準確,就可以吸引到更多嘅目標客戶,令到佢哋消費,增加你嘅收入同品牌知名度。


根據統計,有超過一半喺 Facebook 投放廣告嘅人,都唔識計 ROI (Return on Investmemt),即係我哋所講嘅投資報酬率,如果你連呢個都唔識計嘅話,咁我唔建議你落Facebook 廣告啦,直到你識得計嘅時候先再考慮啦。


最後想提提大家,落廣告主要目的除咗係令到更多人認識你嘅品牌,更多人瀏覽你嘅網站,更多人查詢之外,記住!記住!記住!最緊要嘅係 Sales Conversion 銷售轉換,即係生意,即係錢!一個廣告搵唔到錢就算有1,000,000個 Like 都係冇用,一個廣告賺到錢就算一個 Like 都冇又有咩所謂?我成日都好鍾意據一個例子,有個客人睇到一個生髮廣告,佢去咗你店鋪消費,你覺得佢會唔會 like 你個廣告?唔通佢想話俾人聽佢係冇頭髮嘅咩?有時做人真係要識得變通下。

© 2020 by samsonlomarketing.com