做網店失敗的七大原因

更新日期:2019年7月22日



而家好多人都開始做網店,特別係好多女仔,佢哋自己本身好鍾意買嘢,去世界各地唔同嘅地方搜羅唔同嘅衣服,首飾,精品,由於因為自己嘅喜好,而搵到唔少嘅供應商,而開始想創業做一間屬於自己的網店。


由喜好,變成事業,當然係一件好事,但係真正成功嘅例子並唔係想像中咁多,點解呢?

既然你熱愛一件事,用心去做好佢,點解又會失敗呢?


第一 只偏愛自己喜好,而罔顧市場需要。

每一個品牌都有屬於自己嘅風格,但亦都要迎合市場嘅需要,唔可以只做自己愛做嘅事,如果你淨係賣一啲文青類型嘅衫,首先你要了解市場上文青類型嘅客戶需求是什麼,要了解大部份網店和實體店銷售文青類型嘅衫嘅價錢大約是多少,同時也要了解文青類型嘅衫不同嘅搭配,了解邊一種類型嘅搭配最受歡迎,最受客戶歡迎,唔可以單以自己嘅風格,眼光,去判斷市場嘅需要,這會大大縮窄了你嘅客戶層,減少你嘅品牌曝光率和受歡迎程度。


第二 先做好 再做大

齊家治國平天下,先做好一件事,再做大一件事,唔好過分想得太多,先從最根本做起,如果你嘅網店一開始就賣100件產品,你根本沒有足夠嘅資金做宣傳,更加不能夠分析邊一樣產品比較受歡迎,何不先選10件產品,10件據潛力,價錢合理,符合市場需要嘅產品,為每一件產品建立一份文案,包括功能性,認受性,安全性等等資料,令客戶容易明白和分辨10種產品嘅獨特性。

舉個例,最近經常喺網上面見到賣緊隨身風扇的產品,如果要為隨身風扇建立一個文案,如下:


標題:隨身冷凍風扇

副題:連按即時開啟渦輪模式

內容:有別於一般風扇仔,隨身冷凍風扇不但風力強勁,還設有不同模式,因應不同的需要而作出相對的調教,特設有渦輪模式,能瞬間產生強大的風力,在酷熱嘅天氣下立刻降溫,配備充電式裝置,可持續使用120分鐘,另設有USB叉電模式,隨時隨地都可以充電,榮獲相關安全證書,安心使用。


規格:

重量:2kg

高度:


以上文案只供參考,所有內容均屬虛構。


當你見到以上嘅內容,我相信客戶會毫無疑問,完全了解產品嘅資訊,當客戶了解產品嘅資訊,就會產生購買嘅意欲,如果你能夠為10種產品做10種不同嘅文案,再加以推廣,我相信你會好快知道邊一種產品或者邊幾種產品比較好賣,你就可以開始加大投資,投放更多嘅廣告,令到你嘅利潤增加,記住先做好,再做大。


第三 沒有品牌

好多人話最怕改壞名,改名並唔係想像中咁簡單,首先你要知道有冇人同你同名,除咗改名之外,能唔能夠清楚表達你嘅業務性質同範圍,主要係賣啲咩,有冇提供任何信心保證或者退款承諾,你所賣嘅產品有冇提供品質保證,售後服務等等,就算你開一間雜貨店,咩都賣,你都要有一個品牌嘅名稱,賣每一件貨品嘅時候,要人知道同記得喺邊度買,因為你永遠想買你野嘅人再返嚟幫襯你。我所講嘅品牌係好簡單,有個屬於你嘅網店名稱,簡單介紹網店嘅類型,聯絡電話,網店嘅簡單背景資料,讓人感覺有信心消費。

舉個例,如下:


WE SHOP - 網上數碼產品平台

本店以客為本,所有產品均經過嚴格品質管理,如有任何品質問題,可即時與我們聯絡。


以上例子簡單說明網店名稱,網店類型,網店宗旨,這會大大增加消費者的信心和購買意欲。


第四 沒有資料蒐集

這一點非常簡單,我也不會多說,每件貨品定價之前,先留意市場上同樣貨品的價格大約多少,不要在沒有任何資料蒐集的情況下,亂咁定價。


第五 沒有與你的客人溝通

以客為本,基本上係每一個行業嘅致勝之道,客人買完你嘅貨品,對你嘅品牌產生信任,當你擁有第一班屬於你嘅客人,有無好好留住佢哋呢?有冇定期為已消費嘅客人提供特別優惠?有冇同客人傾計呢?有冇叫佢哋填問卷呢?有冇問下佢哋對你嘅產品有咩意見呢?客人有不滿嘅時候,有冇即時回覆及處理呢?多啲同你嘅客人溝通,你會喺佢哋身上學到更多。


第六 落錯廣告

個客已經買咗你對鞋,你仲繼續比對鞋嘅廣告佢睇,有咩意思呢?又浪費自己廣告費,個客又覺得煩,百害而無一利!廣告嘅設定一定唔可以錯,亦都唔可以懶,因為所有廣告都係錢!如果一個客人買咗你對鞋,你就應該俾搭配呢對鞋嘅褲嘅廣告佢睇,之後再比搭配呢條褲嘅衫嘅廣告佢睇,如此類推,因為所有嘅客人只要第一次喺你嘅網店買過野,佢地再買嘅機會會比起冇係你網店買過嘅嘢嘅人高出50%,因為人係有習慣性,當係一個地方買過一樣野,而覺得嗰樣嘢唔錯,佢就會好懶咁樣去返同一個地方再買另一樣野,所以追蹤客戶的營銷技巧非常重要!


第七 堅持永遠是最難


如果你正在奮鬥,做緊屬於自己嘅網店,記住,不要輕易放棄,成功永遠不是一朝一夕,是一點一滴,累積返嚟。

#samsonlomarketing #samsonlonote

20605 次瀏覽

© 2020 by samsonlomarketing.com