點解要幫襯你?因為呢六個原因



你賣緊嘅嘢好多人都賣緊,不論是產品還是服務,點解你開烤肉店,人哋又開烤肉店,點解啲人唔幫襯你,全部走去幫襯人哋間烤肉店呢?點解你網店賣緊嘅嘢冇人買,但人哋間網店賣緊嘅嘢就好多人買呢?明明你地兩個賣緊嘅野係一樣個喎,百思不得其解......


以下呢六個原因,可能就係致勝關鍵。


第一 為客戶解決問題

我買你嘅產品,買你嘅服務,大部份嘅原因都係因為要解決問題,我買手提風扇,係因為出街嘅時候好熱,我購買纖體療程,因為我想瘦身,我買智能電話,係因為要同其他人WhatsApp,我係你網店買衫,因為我想着得靚啲,大部份人購買嘅意欲都係因為要解決當下嘅問題,只要你幫你嘅客戶解決到當下嘅問題,佢就會買你嘅嘢,做宣傳嘅時候,唔好不停咁樣講你嘅產品有幾好,講你嘅產品有幾利害,唔好自吹自擂,應該講多啲你嘅產品點樣幫客戶解決問題,解決問題嘅時候比起其他產品有咩優勝嘅地方,可以係價錢平,可以係功能好,可以係需要時間大大縮短等等,客戶買緊嘅係你俾佢嘅解決方案。


第二 建立品牌信任度

為咗建立你嘅網店,你嘅公司,首先要建立品牌信任度,最簡單就係講得出,做得到。客人永遠是對的,可能有人會唔同意,但呢句說話往往都係致勝之道。就好似係餐廳落單一樣,客人叫凍檸茶,你就比杯凍檸茶佢,點知個客人話我明明係要凍咖啡,究竟你選擇同佢爭論,定係比杯凍咖啡佢呢?唔同人有唔同嘅做法,但往往聰明嘅做法就係直接換杯凍咖啡俾佢,再加多句唔好意思。品牌,最緊要以客為先,只要建立到口碑,財源就會滾滾來。品牌同信任度往往都係掛鉤,品牌好,自然信任度就高,信任度高,客人消費意欲就會高,但要做到品牌好,並唔係簡單嘅事,好多時因為客戶唔滿意,要退款,因為員工態度唔好,要對客戶道歉,因為送貨送錯地址,要賠償客戶損失,種種不同嘅問題,都會令到你辛苦到抖唔到氣,但記住,今日做多一點,他日賺多一點,好的口碑都係要慢慢,硬着頭皮建立起來的。


第三 比客人攞着數

攞着數,有邊個唔鍾意?成日都有得攞着數,就成日都會消費,買手機送耳機,買風筒送直髮器,客人生日送支唇膏俾佢,客人買BB衫送條口水肩俾佢,明明買一樣野,點知可以拎多樣野走,總係會覺得開心,下次咪會再返嚟買囉,有着數,就會再俾錢,再俾錢,又比着數佢,一路一路無限 loop 落去,佢就成為你嘅忠實客戶。我哋永遠賺嘅唔係 Acquisition,而係 Retention。


第四 希望

好多時候我哋買嘢除咗係為咗解決問題之外,我哋都係想買到希望,咩意思呢?如果我冇頭髮,我買生髮療程,就係為咗想有頭髮,如果我皮膚唔好,我就係想買保濕面膜,令到自己皮膚可以光澤亮麗,好多時候你賣緊嘅嘢唔單只係佢實質嘅功能,而係賣緊一種希望。女仔都係鍾意人讚,要人讚好多時候都係因為外表,要靚就梗係要化妝,梗係有靚嘅衫,而你賣緊嘅就係令佢俾人讚嘅希望,點做到呢?為你所賣的產品影一輯靚嘅相,拍一段靚嘅影片,令人知道買咗你嘅產品,就會變成咁樣,舉個例,搵個身形高挑的模特兒,着起你賣嘅衫,放喺你嘅網店度,比消費者見到,令佢哋聯想到只要佢哋買咗你嘅衫,就會着到好似個模特兒咁靚,其實好多樣嘢都係同一樣道理,點解要買勞力士手錶,就係因為身份的象徵,而身份的象徵就係一種希望,一種俾人感覺你係一個成功人士嘅希望。


第五 服務

售前服務,售後服務,都係非常重要嘅一環,客人未買你嘅嘢,你就好熱衷去說服個客人買嘢,客人買完你嘅嘢,你就對佢置之不理,客人未買你嘅嘢,問長問短,問三問四,你就下意識覺得佢係唔會買,佢好煩,就答都唔答,完全唔理,服務往往是最難的一個環節,因為服務所花上嘅時間,心機,往往是最多的,但你有冇諗過,服務就是在賺取一個客人的心。人在迷惘嘅時候,不安嘅時候,最需要別人伸出援手,就好似黑暗中遇到光一樣,當一個客人買完你嘅嘢,佢發覺用唔到,佢會好嬲,好迷惘,而當刻客戶服務員嘅出現,就為佢哋帶嚟曙光,幾句對話,就能得到客人的心,何樂而不為?


第六 質素

呢一點大家都明,我就唔多講啦。


點解我要幫襯你?

好多時都係因為你嘅 package,而你嘅 package 如果包含以上六點,其實都幾難唔幫襯你。都係果句,幫襯你唔單止因為你所賣緊嘅產品,同時亦因為你付出一顆真誠待客的心。

#samsonlomarketing #samsonlonote

© 2020 by samsonlomarketing.com